Aurkezpena

Proiektu hau Hezkuntza Berriztatzeko departamenduaren lan ildoaren barruan kokatzen da. Zientzia Hezkuntza 2007-2010 aldirako Hezkuntza Berriztatzeko Lehentasun Ildotzat jo da. Esparru horretan, 2008-2009 ikasturtean Lehen Hezkuntzako eta Derrigorrezko Bigarren Hezkuntzako 30 ikastetxe publiko aukeratu dituzte, haietako 5 Araban.

Gure ikastetxean proiektu hau Hezkuntza Departamentuak aurreko bi ikasurteetan, 2006-2007 eta 2007-2008an, Natur Zientzien Hezkuntzan IKTen (Informazio eta Komunikazio Teknologiak) erabilera sustatzeko emandako Berriztatze Ekintzen jarraipena izango da.

Helburuak

Proiektu honen helburu nagusia Natur Zientzien ikas-irakaskuntza prozesua hobetzean datza. Arreta berezia emango zaie Informazio eta Komunikazio Teknologien (IKT) bidez egindako jarduera praktikoei, batez ere ordenagailuz lagundutako esperimentazioari. Horrekin ondoko helburuak lortu nahi ditugu:

• Ikasleen motibazioa suspertu arlo zientifikoetan.

• Irakasleen formazioa hobetu, teknologia berrien ezagutzan, teknologia horiek Natur Zientzietan eskaintzen dizkigun baliabide didaktikoetan eta baita esperimentazio eta ikerketa lanerako tekniketan ere.

• Ikasgaiaren irakaskuntza gaurkotu.

• Laborategiko lana hobetu.

• Laborategiaren erabilera bultzatu.

• Multimedia baliabideak eta ikastetxearen azpiegitura telematikoari etekin didaktikoa atera.

Antolaketa

Proiektuak bost partaide izango ditu: Natur Zientzietako 1. zikloko irakaslea, Biologia eta Geologia irakaslea, Fisika eta Kimikako bi irakasle eta Informatika arduraduna. Proiektua aurrera eramateko formakuntza orduak erabiliko ditugu.

Talde horren lanak ondoko urratsak beteko ditu:

• Programazioak aztertu eta baliabide berrien bidez hobekuntzak proposatu.

• Material berria aztertu eta bere erabileran trebatu.

• Ikasleekin praktikak egiteko txostenak prestatu.

• Ikasleekin Praktika berriak burutu.

Arduradun orokorra:Zientzia Mintegia